Skref-fyrir-skref: Hvernig á að þrífa gerviaugnhár eftir notkun!
Þegar maður kaupir góð og vönduð gerviaugnhár, er ekkert mál að nota þau í fleiri en eitt skipti. Til að þau haldist falleg er mikilvægt að þrífa þau vel eftir hverja notkun. Ef maður gerir það rétt verða þau nánast eins og ný og ég nota flest öll augnhárin mín í nokkur skipti áður en ég hendi þeim. Augnhárin sem ég er með til að sýna ykkur í dag eru Date Night frá Tanyu Burr. Það allra mikilvægasta er að fara mjög varlega, því augnhár eru viðkvæm og geta orðið ljót ef maður gerir það ekki. Að þrífa þau tekur enga stund og er alveg þess virði til að geta notað þau aftur!
Fyrst byrja ég á að taka gamla límið af bandinu. Mér finnst best að nota bara neglurnar til að plokka það af og toga varlega í það. Það er mjög mikilvægt að halda á móti í augnhárin þar sem maður er að tosa af, svo bandið beygjist ekki eða bogni. Ég geri þetta mjög varlega þangað til ekkert lím er eftir á bandinu.
Maður sér greinilega þegar límið er farið af og bandið er hreint, sérstaklega á þessum augnhárum þar sem bandið er glært. Límið sem ég notaði var límið sem fylgdi með í pakkanum og það fer mjög auðveldlega af.
Næst er komið að því að hreinsa gamlan maskara af augnhárunum. Ég geri það með bómullarskífu og augnfarðahreinsi, en það er líka mjög gott að nota svona bómullarhnoðra þar sem þeir eru oft mýkri og auðveldara að strjúka af með þeim án þess að toga í (átti bara ekki svoleiðis). Mér finnst langbest að nota tvöfaldann olíuhreinsi, og ég nota alltaf minn uppáhalds sem er fyrir augu og varir frá L’oreal.
Þegar ég er búin að bleyta bómul með augnfarðahreinsi set ég augnhárin mín á hreinann disk. Næst byrja ég að strjúka þau frá bandinu og í átt að endunum með bómullnum. Það er mjög mikilvægt að gera þetta líka mjög varlega. Ég held við bandið þar sem ég er að fara með bómulinn, og nudda honum aðeins í léttar sikk/sakk hreyfingar eftir hárunum til að ná öllu af. Þetta skref virkar alveg eins með bómullarhnoðra.
Yfirleitt er ekkert mikill maskari á augnhárunum mínum, þar sem ég nota yfirleitt bara smá maskara til að blanda þeim við mín eigin þegar ég er með þau á mér. Það er samt alltaf einhverjar leyfar sem er mikilvægt að þrífa af ef maður vill nota þau aftur, því annars geta þau verið föst saman og myndast klessur á þeim þó maður noti aftur bara smávegis maskara næst.
Þegar augnhárin eru alveg hrein greiði ég aðeins í gegnum þau með lítilli greiðu, svo þau verði alveg fín og slétt og engin flækt saman.
Það er langbest að geyma notuð augnhár í pakkanum sem þau komu í, svo ég mæli alltaf með að geyma pakkann þó maður sé að nota augnhárin. Ég læt þau liggja meðfram boganum svo þau séu alveg eins og þegar ég keypti þau.
Og þá eru þau tilbúin til notkunar fyrir næsta skipti!
xxx
