Heima hjá mér: Á stofuborðinu
Eins og ég var búin að lofa ykkur mun ég sýna ykkur myndir af heimilinu mínu þegar það er orðið aðeins meira eins og ég vil hafa það, en ég flutti inn fyrir mánuði síðan. Ég er að hugsa um að taka fyrir eitt herbergi í einu og sýna ykkur myndir í færslum tileinkaðar hverju herbergi eða rými fyrir sig. Að gera heimilið mitt eins og ég vil hafa það tekur tíma, og mér finnst aldrei eins og það sé kominn réttur tími til að sýna ykkur myndir. Ég lofa samt að þið fáið alveg rétt bráðum að sjá fleiri myndir..þegar ég er búin að gera aðeins meira!
Ég má samt til með að sýna ykkur mynd af bakkanum sem stendur á stofuborðinu mínu akkúrat núna. Ég keypti mér þetta ofur krúttlega pastelbleika stofuborð í Ikea, á 1990kr. Það kom aldrei til greina að sleppa því..enda vantaði mig stofuborð og svo er það bleikt, fullkomið. Ég er búin að panta mér rúllu af marmarafilmu sem ég ætla að líma ofan á borðplötuna, en ég held að það eigi eftir að verða akkúrat stofuborðið sem ég vil. Hvíti bakkinn er úr Ikea ferð #2 eftir innflutning og mér fannst hann tilvalinn undir Iittala skálarnar mínar. Servíettustandinn átti ég, en hann er líka úr Ikea og fæst held ég ennþá. Ég raðaði uppáhalds pastel naglalökkunum mínum þessa stundina í svörtu skálina, en ég elska að nota snyrtidótið mitt til að skreyta í kringum mig. Það er ekki nóg fyrir mig að eiga það til, ég vil líka horfa á það allann daginn! Ég var svo heppin að fá fríhafnar lakkrís sendingu um daginn og fékk bæði A og B Johan Bulow lakkrís sem fékk að standa á bakkanum. Umbúðirnar eru reyndar tómar núna, ótrúlegt en satt, en standa samt ennþá á bakkanum. Ég held ég sé að bíða eftir því að það birtist nýr lakkrís í þeim..ætti ég ekki að halda áfram að bíða og vona?
xxx
